你唔係太敏感，你只係一直冇被好好接住

你有冇試過，淨係換咗個環境嘈少少，或者對方語氣重咗少少，你個人已經攰到唔想郁。旁邊嘅人可能仲會加多句：「使唔使咁誇張，我都冇覺得點。」

「你諗多咗」「你太敏感」，呢兩句說話，我喺治療室聽過好多次。有時係客人轉述屋企人講嘅，有時係佢哋自己都已經學識咗，喺講出感受之前，先幫自己打個折。

「你諗多咗」呢句說話，一直教你唔好信自己

高敏感嘅人, 通常唔係想像力豐富, 而係真係接收緊多過人一截嘅資訊。房入面邊個唔開心, 對話入面邊句話冇講出口, 呢啲你都會感應到, 而其他人可能完全冇留意到。

問題係, 當你講出嚟, 換來嘅經常係「你診多咗」。次數多咗, 你就唔再講, 但感受冇消失, 你淨係學識咗唔再信自己接收到嘅嘢。

高敏感唔係缺陷，係一種接收方式

高敏感神經系統, 對聲音、光線、人嘅情緒, 反應本身就快過同深過一般人。呢個唔係性格弱點, 係神經系統嘅設定, 就好似有啲人天生對氣味敏感一樣。

問題唔喺敏感本身, 而喺你有冇一個安全嘅方式去處理你接收到嘅嘢。冇呢個位, 敏感就會變成長期過載, 你會成日覺得攰, 但又講唔出攰喺邊度。

一個真實經歷

有個客人第一次嚟, 話自己「成日冇端端唔開心」。傾落去先發現, 佢好識留意人, 一個朋友語氣重少少, 佢已經反覆諗成晚, 諗自己係咪做錯咗啲乜。

我問佢：「呢件事, 係關於你, 定係關於你接收咗佢嘅情緒？」佢諗咗好耐, 話從來冇人咁樣問過佢。

再傾多幾次, 佢開始學識分返, 邊啲係自己嘅感受, 邊啲係接收返嚟嘅。佢話, 呢個分別, 令佢第一次覺得個腦冇咁亂。

高敏感人最需要嘅，唔係變麻木

好多高敏感人以為, 出路係練到自己冇咁敏感, 學識「睇開啲」。但呢個方向通常令情況更差, 因為你等於叫個已經好攰嘅系統, 再用多分力氣去壓抑。

真正有用嘅, 通常唔係關閉接收, 而係學識點樣有意識咁放低, 唔使成日將接收到嘅嘢, 自動當成自己嘅。

今晚可以試嘅一件事

今晚如果你又覺得成個人攰晒, 但講唔出點解, 可以試下問自己: 呢種攰, 有幾多係我自己嘅, 有幾多係我今日喺人堆入面接收返嚟嘅。

你唔使即刻有答案, 淨係畀自己諗一諗呢個問題, 已經係開始學識分返自己同接收到嘅嘢。

→ 如果你都想搵個空間, 唔使解釋自己點解咁敏感, A Space to Be Heard《一個被聽懂的空間》: 一星期嘅語音同文字陪伴, 冇評判咁聽你講, 慢慢拆開壓住你嘅嘢。

→ 想慢慢了解多啲自己, 可以收我寫俾你嘅 《回到你的聲音》三封信, 一封一封慢慢傾, 喺首頁 Join the letters 留低 email 就得。