內在小孩：香港人最少人講，但最多人需要嘅療癒

你有冇試過, 明明而家嘅生活睇落冇問題, 但心入面總係有一種說不出嘅唔夠好？

升職都好, 拍拖都好, 儲夠錢都好。你以為做到呢啲, 個心就會靜落嚟。但實際上, 嗰種「唔夠好」嘅感覺, 只係換咗個形式繼續存在。

如果你有呢種感覺, 我想同你講一件事: 呢個未必係你而家嘅問題, 而係你內在小孩仍然喺度等緊你。

乜嘢係「內在小孩」

內在小孩, 講嘅唔係一個真係存在嘅小朋友, 而係你心入面仍然保留住嘅, 細個嗰陣未被聽見、未被安撫嘅部分。

細個嗰陣, 如果你曾經因為情緒被人話「駛乜咁誇張」、因為表現唔夠好被人比較、或者因為想要多啲關注而被覺得麻煩, 呢啲經歷唔會因為你長大咗就自動消失。佢會收埋喺你嘅反應模式入面, 一直等一個機會再出返嚟。

你可能已經同佢相處緊, 但唔知道

內在小孩唔會攞住個牌, 話畀你知「我依家出嚟喇」。佢通常喺呢啲時候出現：

你明明冇做錯嘢, 但一被人語氣重少少, 就即刻覺得自己好差。

你好難拒絕人, 因為驚一拒絕, 對方就唔要你。

你完成咗一件本身好叻嘅事, 但心入面嗰句聲一直係: 都係好彩啫, 唔係真係咁叻。

呢啲反應, 好多時唔係「而家」發生嘅事引起, 而係一個舊有嘅情緒被觸動。

我喺催眠治療入面見過嘅一幕

有一次, 一位客人嚟搵我, 佢話自己最近喺工作上遇到少少批評, 就情緒崩潰咗成日, 佢自己都覺得反應大到唔合理。

喺催眠嘅深度放鬆入面, 佢慢慢行返去一個細個嘅畫面: 大概七八歲, 佢畫咗一幅畫拎去俾屋企人睇, 換嚟嘅係一句「畫成咁都拎出嚟獻世」。

佢喺療程入面靜咗好耐, 然後講咗一句我到而家都記得: 「原來我一直都驚, 自己攞出嚟嘅嘢唔夠好。」

嗰一刻唔係我話畀佢聽發生咗咩事, 而係佢自己聽返到, 一直存在但佢自己都唔知道原因嘅嗰種驚。

點解「識咗」唔代表「已經處理咗」

好多人睇完呢類文章, 或者上網睇過相關資訊, 都會知道「原來我有內在小孩需要療癒」。但知道, 同真正處理, 係兩件事。

理性上明白一件事, 唔會令個情緒反應消失。內在小孩唔係靠道理去說服嘅, 佢需要嘅係一個安全嘅空間, 俾佢真正被聽見、被接住。

呢個亦係點解好多人試過睇書、聽 podcast、自己反思, 但去到情緒觸動嗰一刻, 反應仍然一樣。唔係你唔夠努力, 而係呢層需要更深入嘅方式先觸及到。

催眠治療點樣幫到內在小孩

催眠治療嘅深度放鬆狀態, 可以幫你行返去情緒最初形成嗰個時刻, 唔係要你重新受傷一次, 而係俾你用而家已經有能力、有資源嘅自己, 重新陪返細個嗰個你。

呢個過程唔會一次就完全解決, 但通常做完之後, 你會發現一啲原本一觸即發嘅反應, 開始有咗一啲空間, 俾你可以選擇, 而唔係自動反應。

如果你睇完呢篇文, 覺得自己都有呢種「明明冇事, 但個心一直冇靜落嚟」嘅感覺, 呢個可能就係你嘅內在小孩, 想你留意佢一下。

→ 想每晚俾自己十分鐘, 慢慢陪返細個嗰個你, 可以試吓 《Return》10 分鐘內在重置指南

→ 如果你想慢慢嚟, 歡迎加入 《回到你的聲音》三日迷你旅程, 由我親自寫俾你嘅三封信開始, 喺首頁 Join the letters 留低 email 就得