你唔係太好相處，你只係驚令人失望
你有冇試過，人哋一個訊息彈出嚟，你幾乎同一秒已經覆咗「好啊，冇問題」，但個心入面明明想講「唔」？
你可能都試過，答應咗之後先開始後悔，甚至唔明點解自己會咁快答應。
如果呢種情況成日發生喺你身上，呢個唔係因為你特別好人，而係你心入面有一套好熟悉嘅計算，喺你意識到之前已經行完。
「唔想拒絕」嘅底層，通常唔係善良，而係驚
「好」唔一定係善良，有時只係喺極短時間內，算完咗一筆帳。呢筆帳入面計緊嘅，通常係「佢會唔會唔高興」、「佢會唔會覺得我難相處」、「如果我推咗，關係會唔會變差」。
呢個計算快到你自己都未必留意到，因為佢已經變成一個反射動作。你習慣咗優先考慮對方嘅感受，多過俾空間畀自己嘅感受。
呢個模式好多時源於一個更早嘅學習：對你嚟講，令人失望嘅代價，一直都比委屈自己更大。
我喺催眠治療入面見過嘅一個個案
有一位客人嚟搵我，佢喺公司出咗名「有求必應」，同事有嘢做唔切都會搵佢幫手，佢每次都應承，但夜晚返到屋企，成個人攰到唔想同任何人講嘢。佢話：「我都唔知點解，個口好似自動㗎，未診清楚就已經應承咗。」
喺催眠嘅深度放鬆入面，佢行返去一個細個嘅畫面：細個嗰陣，屋企人心情唔好，佢學識一件事，如果佢乖、唔製造麻煩、乜都應承，屋企氣氛就會鬆返啲。
佢靜咗一陣，然後講咗一句：「原來我一直都覺得，我嘅需要，會令人麻煩。」
嗰一刻佢先明白，成年之後嗰種「唔敢話唔」嘅反應，唔係佢而家軟弱，而係細個嗰陣學識嘅一種保護自己嘅方法。
三個問題，幫你分辨呢個「好」係咪真心
下次個口又自動話「好」之前，可以試吓問自己呢三個問題：
呢個「好」，係出於真心，定係出於驚？
如果我拒絕，我具體驚緊嘅係乜嘢？
喺呢個決定入面，我有冇將自己嘅感受都計埋一份？
呢個過程唔使急，覺察到呢一下「慢半拍嘅唔想」，已經係好重要嘅第一步。
呢個模式點解會咁根深蒂固
呢種習慣唔係一時三刻養成，而係一次又一次具體嘅經歷入面，慢慢儲落嚟嘅生存策略。細個嗰陣，佢曾經真係幫到你，令你更安全、更少衝突。
但成年之後，你已經唔再需要靠不斷應承先換到安全，只係個舊有嘅反應仍未收到「而家可以唔同」嘅訊號。呢個唔係你嘅性格缺陷，而係一個值得重新睇返嘅舊習慣。
唔使一步到位，由覺察一次開始
你唔使即刻學識拒絕所有人。可以由留意一件事開始：下次個口想講「好」嗰陣，俾自己一個呼吸嘅空間，先問返自己頭先嗰三個問題。
催眠治療嘅深度放鬆狀態，可以幫你行返去呢種模式最初形成嗰個時刻，用而家已經有嘅理解同資源，重新回應細個嗰個你，慢慢鬆開「一定要應承先安全」嗰條線。
如果你都有呢種「答應完先後悔」嘅感覺，呢個未必係你唔夠堅定，而係你嘅心，仲未學識點樣把自己都計算埋一份。
→ 如果而家有一件「唔想令人失望」嘅事卡住你, 可以試吓 《聽你說 · 為你而想》: 你用文字話我知, 我用廣東話錄一段只係講俾你聽嘅語音, 再附一頁紙寫低你下一步可以點行。香港限定, 而家 HK$99。
→ 如果你想慢慢嚟, 歡迎加入 《回到你的聲音》三日迷你旅程, 由我親自寫俾你嘅三封信開始, 喺首頁 Join the letters 留低 email 就得
