內在小孩受傷嘅 5 個信號：你以為係性格，可能係舊傷

有啲反應, 你一直以為係自己性格: 太容易道歉、好怕麻煩人、一被批評就成日耿耿於懷。

但如果你靜落嚟諗, 會發現呢啲反應好多時比你而家嘅年紀更舊。佢哋未必係性格, 可能係內在小孩仲未被照顧好嘅信號。

呢篇文我會講 5 個常見嘅信號, 同埋察覺到之後, 你可以點樣溫柔咁回應自己。

內在小孩係咩?

內在小孩係心理學同療癒工作入面常用嘅概念, 指我哋細個時嘅感受、需要同記憶, 到長大之後仍然喺入面影響緊我哋。

如果細個某啲需要冇被好好回應, 例如被聽見、被接納、可以犯錯, 呢部分嘅你就會一直用佢識嘅方法保護自己。想了解多啲, 可以睇我之前寫嘅《內在小孩: 香港人最少人講, 但最多人需要嘅療癒》。

內在小孩受傷嘅 5 個常見信號

1. 你好難開口要嘢。 就算好需要幫手, 你都寧願自己頂住, 因為開口好似會令人覺得你麻煩。

2. 人哋一句批評, 你會諗成日。 十句讚都唔夠一句批評咁大聲, 你甚至會喺夜晚重播嗰個畫面。

3. 你成日無端端講「唔好意思」。 未發生任何事, 你已經準備好道歉。

4. 休息會令你內疚。 一停低就覺得自己懶, 好似要做到啲嘢先有資格唞。

5. 你好清楚別人要乜, 但講唔出自己要乜。 你好識照顧人, 輪到自己, 腦入面就一片空白。

有其中一兩個唔代表有問題, 每個人都會有。但如果你喺好幾個入面都見到自己, 可能值得停低, 聽下入面嗰個細個嘅你想講乜。

我點樣察覺到自己嘅信號

我自己嘅信號係第 3 個。有一段時間, 我連去餐廳叫多杯水都會先講「唔好意思」。

我一直以為係禮貌, 直至有一次做催眠練習, 腦入面浮現嘅唔係任何大事件, 而係一種好熟悉嘅感覺: 好想做乖、唔想阻到人。嗰刻我先明白, 嗰句「唔好意思」唔係講畀侍應聽, 係細個嘅我一直講緊畀自己聽。

察覺之後, 可以點做

第一步唔係改, 而係認得。下次你又想道歉、又想逼自己、又講唔出自己要乜嘅時候, 心入面同自己講一句: 「我見到你喇。」

聽落好簡單, 但好多人由細到大都未試過咁樣對自己。你唔需要即刻變得勇敢, 只需要唔再催自己。

如果想有一個固定嘅方法練習, 我設計嘅《Return》十分鐘內在對齊重置指南有四個步驟: 停下、感受、回歸、錨定, 每日十分鐘就做得到。想了解催眠點樣處理呢啲舊信念, 可以睇《用催眠療癒內在小孩: 點解你成日覺得唔夠好》。

提提你: 呢篇文係分享同陪伴, 唔係診斷或者治療。如果你正經歷好大嘅情緒困擾, 請搵專業醫療人員協助。

→ 想有人先好好聽你講? A Space to Be Heard: 一星期嘅語音同文字陪伴, 先被聽懂, 再諗下一步。

→ 想由自己開始? 《Return》十分鐘重置指南, US$5。或者睇下我嘅服務。